ബറേലി: മുപ്പത്തിയാറ് വർഷം മുമ്പ് ഉത്തർപ്രദേശിലെ ബറേയ്‌ലിയിലെ നിന്നും മുങ്ങിയ കൊലക്കേസ് പ്രതിയെ പിടികൂടി പൊലീസ്. പ്രദീപ് സ്‌ക്‌സേനയെന്നയാളാണ് മൂന്നുപതിറ്റാണ്ടിലേറെയായി പൊലീസിനെ വെട്ടിച്ച് മുങ്ങി നടന്നത്. സഹോദരനെ കൊലപ്പെടുത്തിയ കേസിൽ ജീവപര്യന്തം ശിക്ഷ അനുഭവിച്ചു വന്ന ഇയാൾ പരോളിൽ ഇറങ്ങി മുങ്ങുകയാണ് ഉണ്ടായത്. പിന്നാലെ ഇയാൾ മതപരിവർത്തനം നടത്തുകയും പേരും രൂപവും മാറ്റുകയുമായിരുന്നു.
1987ലാണ് കേസിനാസ്പദമായ സംഭവമുണ്ടായത്. 1989ൽ ഇയാൾ ശിക്ഷിക്കപ്പെട്ടു. പിന്നീട് മൊറാദാബാദിലേക്ക് കടന്ന പ്രതി അവിടെ നിന്നും നൂറു കിലോമീറ്റർ അകലെയുള്ള പ്രദേശത്തെത്തി പുതിയ ജീവിതം ആരംഭിച്ചു. പ്രദീപ് സക്‌സേന ഇതോടെ അബ്ദുൾ റഹീമായി. താടിയൊക്കെ വളർത്തി രൂപം മാറ്റി ഡ്രൈവറായി ജോലി ചെയ്ത് വരികയായിരുന്നു.
ഇക്കഴിഞ്ഞ ഒക്ടോബർ 16ന് സക്‌സേനയെ നാലാഴ്ചക്കുള്ളിൽ കോടതി സമക്ഷം ഹാജരാക്കണമെന്ന് അലഹബാദ് ഹൈക്കോടതി ഉത്തരവിട്ടു. ഇതോടെ ഉദ്യോഗസ്ഥർ കേസ് ഫയൽ പൊടിതട്ടിയെടുത്തു, ഒരു സംഘത്തെ ഇയാളെ കണ്ടെത്താനായി നിയോഗിച്ചു.
പിന്നാലെ സക്‌സേനയുടെ മറ്റൊരു സഹോദരനെ പൊലീസ് ബന്ധപ്പെട്ടു. തുടർന്നാണ് ഇയാൾ മതവും ഐഡന്റിന്റിയുമെല്ലാം മാറ്റിയെന്ന് അറിയുന്നത്. കൂടുതൽ അന്വേഷണത്തിൽ പ്രതി പലപ്പോഴും ബറേലിയിൽ എത്തിയിട്ടുണ്ടെന്നും വ്യക്തമായി. ഒടുവിൽ പ്രതിയെ വിദഗ്ധമായി പൊലീസ് വലയിലാക്കി.
ചോദ്യം ചെയ്യലിൽ താൻ പ്രദീപ് സക്‌സേനയാണെന്ന് പ്രതി സമ്മതിച്ചു. 2002ലാണ് ഇയാൾ രൂപവും ഭാവവുമെല്ലാം മാറിയത്. കഴിഞ്ഞദിവസം ഇയാളെ പൊലീസ് കോടതിയിൽ ഹാജരാക്കി. ഇയാൾ പരോളിലിറങ്ങിയ ശേഷം ആൾമാറാട്ടം നടത്തി ഒരു മുസ്ലീം സ്ത്രീയെ വിവാഹം കഴിക്കുകയും ചെയ്‌തെന്ന് പൊലീസ് പറയുന്നു.
Content Highlights: UP Man, a murder accused changed identity and escape police radar caught after 36 years